
帝洛巴大師教言集TILO21ཕྱི་སྒྲུབ་ཀྱིས་རྟེན་འབྲེལ།
1-9-2a

༄༅། །ཕྱི་སྒྲུབ་ཀྱིས་རྟེན་འབྲེལ།
༆ [༄༅། །ཕྱི་སྒྲུབ་ཀྱིས་རྟེན་འབྲེལ་པཎ་ཆེན་བྷི་བུ་ཏི་ཙནྡྲས་མཛད་པ་བཞུགས་སོ། །]བླ་མ་མཆོག་ལ་ཕྱག་འཚལ་ལོ། །རྒྱལ་སྲས་ནཱ་རོ་པས་ཡི་
གེ་བདུན་པ་སྒྲུབ་པས། ལུས་མེད་མཁའ་འགྲོའི་ལུང་བསྟན་ཐོབ། ཤར་ཕྱོགས་སུ་བླ་མ་འཚོལ་དུ་ཕྱིན། གུ་རུ་ཏིལློ་པ་བྱ་བ་གྲུབ་ཐོབ་ཐོས་སམ་བྱས་པས། བླ་མ་ཏིལློ་པ་བྱ་བ་མ་ཐོས། སྤྲང་པོ་ཏིལློ་པ་བྱ་བ་འདི་ཀུན་ན་འདུག་ཟེར་རོ། །གཙུག་
ལག་ཁང་གཙུག་ཕུད་སྤྲ་(པྲ་)བྷ་བྱ་བའི་སྒོ་ན། རས་གྷ་འཇའ་ར་གྱོན་པའི་ཛོ་ཀི་སྤྱན་རྩ་དམར་ཤིག་གེ་བྱས་པ་གཅིག་འདུག་པས། ཉ་བསོན་(གསོན་)པོ་ལྔ་བཟུང་ནས་དགེ་འདུན་གྱི་སྤྲོ་ཁང་དུ་བསྲེག་པས། དགེ་འདུན་རྣམས་ཀྱིས་སྡིགས་པས་ཁྱེད་མི་དགའ་
བ་མི་བྱེད་གསུང་ནས། སེ་གོལ་སྡབས་(བརྡབས)ཏེ། ཉ་ཆུ་ཟང་དུ་(ཟངས་སུ་)བཅུག་པས་མ་ཤི་བར་འཁྱུག་གིན་འདུག་གོ། །དེར་ངེས་པར་ཏིལློ་པར་འདུག་སྙམ་ནས། མཎྜལ་རེ་ཕུལ་ཏེ། ཟབ་མོའི་གདམ་(གདམས་)ངག་ཞུས་པས། ཐོག་མ་ཉིད་དུ་སྤྱན་ཅེ་རེ་གཟིགས་ནས་འདི་སྐད་
གསུང་། ཁྱོད་རྫོགས་པའི་སངས་རྒྱས་ཚེ་འདིར་སྔོན་དུ་བྱ་བར་འདོད་ན། ལམ་མཐར་ཐུག་ཟབ་མོ་བླ་མའི་ལམ། མོས་གུས་མཐར་ཐུག་བླ་མའི་མོས་གུས། སྒྲུབ་པ་ཟབ་མོ་བླ་མའི་སྒྲུབ་པ། དམ་ཚིག་ཟབ་མོ་བླ་མའི་དམ་ཚིག །རྟེན་འབྲེལ་ཟབ་མོ་བླ་མའི་རྟེན་
འབྲེལ། འབྲས་བུ་མཐར་ཐུག་བླ་མའི་འབྲས་བུ། སྐུ་གསུམ་རྡོ་རྗེ་འཛིན་པའི་གོ་འཕང་བླ་མ་ལས་བསྒྲོད་པར་གྱིས་གཅིག་གསུང་། སྒྲོན་ཤིང་འཚལ་(ཚལ་)བུ་ཤིང་འགལ་(མགལ་)གསུམ་ལ་མེ་བཏང་ནས། འདིར་སྡོད་ནུས་སམ་གསུང་། དེར་བླ་མའི་བཀའ་
1-9-2b

སྒྲུབ་པའི་ཕྱིར་དེར་འདུག་པས་མེས་ཚིག །གུ་རུའི་ཞལ་ནས། ཁྱོད་ཀྱིས་གུས་པའི་བསམ་པ་དང་། །ངའི་(ཡི་)བཀའི་(ཡི་)བདེན་པ་ཡིས། །སྔ་མ་ཁོ་ན་བཞིན་དུ་ཤོག །གསུངས་པས་བསོས་སོ། །དེར་ངེས་ཤེས་སྐྱེས། ཡང་དག་པའི་གདམ་(གདམས་)ངག་ཞུས་པས།
ནཱ་རོ་པས། སྲིད་དང་འདས་པས་བསྡུས་པའི་ཆོས་རྣམས་ལ། །བླ་མ་རྡོ་རྗེ་འཛིན་པ་མ་ཡིན་པ། །ཏིལློ་པའི་(ཡིས་)ཅི་ཡང་བསྟན་དུ་མེད། །གསུངས་སོ། །ཨིནྡྲ་བྷོ་ཏིས་ཚོགས་ལ་སྤྱན་དྲངས་པའི་དུས་ན། མོས་གུས་མ་བཅོས་པ་བྱུང་བས། འཁོར་བའི་ཆོས་ལ་
བཅོས་མ་དགོས་པའི་རྟོགས་པ་སྐྱེས། །དེར་གུ་རུའི་(རུས་)མཁྱེན་བཞིན་འདི་སྐད་གསུངས། །བླ་མ་ས་གཞིའི་རང་བཞིན་ལས། །རྒྱུ་དང་མི་རྒྱུའི་རྟེན་པ་བྱེད། །བླ་མ་ཡེ་ཤེས་མེ་ཆེན་ལ། །སྒྲིབས་(སྒྲིབ་)གཉིས་བག་ཆགས་བསྲེག་པར་བྱེད། །བླ་མའི་བྱིན་བརླབས་རླུང་
གིས་ནི། །ཡོན་ཏན་གོང་དུ་གཡོ་བར་བྱེད། །བླ་མའི་ཐུགས་རྗེའི་ཆུ་བོ་ལས། །འགྲོ་བ་གཉིས་ཀྱིས་བསོ་སྐྱེད་མཛད། །བླ་མ་ཤེས་རབ་ཟླ་བ་ཡིས། །མ་རིག་མུན་པ་སེལ་བར་བྱེད། །བླ་མ་ཐབས་ཀྱིས་ཉི་མ་ཡིས། །ཉོན་མོངས་རླན་རྣམས་སྐེམ་པར་བྱེད། །
བླ་མ་མཁའ་ལྟར་དག་པ་ལས། །ཕྱོགས་འཛིན་ཐམས་ཅད་འཇིག་པར་བྱེད། །བླ་མའི་བྱིན་རླབས་རླན་གྱིས་ནི། །ནད་རྣམས་ཐམས་ཅད་སེལ་བར་བྱེད། །བླ་མ་དཔག་བསམ་ཤིང་བཞིན་དུ། །འདོད་པའི་འབྲས་བུ་སྟེར་བར་བྱེད། །བླ་མ་ལ་ལྟོས་ཤེལ་
བཞིན་དུ། །མཆོག་དང་ཐུན་མོངས་(མོང་)དངོས་གྲུབ་ཐོབ། །བླ་མ་ཡིད་བཞིན་ནོར་བུ་ལྟར། །ཕུན་སུམ་ཚོགས་པ་བསྐྱེད་(སྐྱེད་)པར་བྱེད། །དེ་ཕྱིར་དེ་ལ་དམ་པར་བྱོས། །ཞེས་གསུངས་སོ། །བླ་མ་གུས་པས་བརྟེན་པ། དཔལ་འཇིགས་མེད་གྲགས་པ་ལ། བླ་མ་ཏིལློ་པས་
1-9-3a

གསུངས་པའོ།། །།


目錄
ཕྱི་སྒྲུབ་ཀྱིས་རྟེན་འབྲེལ།